أنا بقدم دعوة لكل عضو في الموقع جديد وقديم كله يدخل هنا ويكتب نبذه عن نفسه ويعرف نفسه لباقي الأعضاء عشان تكون دي خطوة كويسة إننا نكون أسرة واحدة كلنا نعرف بعض وبنخاف على بعض وبنشارك بعض ونساعد بعض وقلبنا على بعض ... وكل بعض وانتوا طيبين .
ياريت نبدأ بالأعضاء القدام عشان نكون قدوة لغيرنا .. وأي عضو جديد يدخل ويعرف نفسه .
وأنا هابدأ بنفسي .. أنا إسمي : وسيم محمد سعيد الأشقر .
باعمل مهندس كمبيوتر .. متزوج وعندي ولد صغير إسمه آمر .. يعني ممكن أي حد يقولي يابو آمر .
هواياتي القراءة والإطلاع ومساعدة الآخرين وطبعاً الكمبيوتر والإنترنت .
وأي حد عايز يعرف أي حاجة تانية عني أنا تحت أمركم .
منتظر ردودكم ومشاركاتكم ويارب يا رب كل عضو في الموقع يدخل ويتكلم عن نفسه هنا .

أوكى أنا أسمى :هديه سويلم محمد على.
كنت بشتغل مصوره فوتوغرافيا محترفه و تقاعدت مؤخراً.
عندى هند و أحمد
هوايتى التصوير و الفوتوشوب و الكمبيوتر و الأنترنت و الخياطه و ممارسة الأعمال اليدويه و الرسم على الزجاج.
بحب كل الناس اللى أعرفهم واللى ما أعرفهمش

انا اسمى ايمان حسن محمد عندى 31 سنة اخصائية اجتماعية ومبشتغلش عندى 3 اولاد احمد ونور وفضل وجوزى مهندس كيميائى انا هوايتى المطبخ والاشغال اليدوية وباحب الكمبيوتر بس انا على قدى ونفسى احترف فية والحمد لله باحب كل الناس واهم حاجة انى مبزعلش من حد خالص بسامح الكل

بداية جميلة وده بالظبط اللي كونت متوقعه لأول مشاركتين وأتعشم وأتمنى إن الموضوع ما يقتصرش علينا إحنا الثلاثة زي كتير من المواضيع وإن كل الأعضاء يدخلوا ويشاركو .

انا اسمى نيللى سمير الغزولى
متزوجه وعندى 3 اولاد عمر وساره ومريم
انا تخصص سياحه وفنادق وتجاره لكن مشتغلتش باى حاجه من الحاجات دى
واشتغلت فى التصوير والافراح لانى شايفه نفسى موهوبه اكتر فيها
وعندى خلفيه كافيه عن الكمبيوتر والجرافك والانتر نت والسوفت وير وكده
واكيد طبعا بحب الناس اللى بيحبونى واللى مبيحبونيش مليش تعامل معاهم لانى مبحبش اكون منافقه

شكراً للمديرة على تشريفها للموضوع .. ويارب يدخل كل الأعضاء .

وإيه الرد الغريب ده ياهبة ؟؟ ولا ده رد خاص بالأستاذة نيلي .

انا اسمي اماني محمد عندي 20 سنه وخلصت معهد كمبيوتر ومش بشتغل وهواياتي طبعا النوم والطبخ وبحب الكمبيوتر والتليفزيون

ده رد يتحس ما يتقريش يا أستاذ وسيم

هو انا قولتلك إكتبيه ... أنا قصدي موجه لمين .. هل ده شعور بالحب ناحية كل أعضاء المنتدى .. أم ده رد موجه لصاحبة الرد السابق فقط ؟
أعتقد كده الصورة واضحة .

انا اسمى : على محمد على
عندى 15 سنة ( على قدى يعنى)
و سبب اشتراكى هنا انى كنت عايز حاجة مفيدة على النت علشان انا كنت مقديها شات وبس
انا بحب الكمبيوتر اوى و النت كمان و بحب اساعد اى حد حتى لو مليش مصلحة ف الماعد اللى بقدمها
انا شايف ان الناس هنا صعب اقول عليهم اصحابى انتو اكبر كتير (لو ممكن تبقوا اخواتى الكبار)......
شكرا للفرصة دي, شكرا جزيلا

لصاحبة الموضوع أولا و لكل الأعضاء يا أستاذ وسيم

طيب انا اسمى
منى سراج الدين مدرسه لغه انجليزيه ليسانس اداب وتربيه بس انا تركت المجال دا من حوالى سنتين
وانا دلوقتى بشتغل فى قسم العلاقات العامه والدعايه والاعلان
باحدى شركات البترول
عندى 26 سنه
بحب القراءة والمغامره والرياضه بعض الشىء
والمنتدى باعضاءه هم اسرتى اللى بحبها جدااا

رامى عبد الستار
محامى
لدى محكمه النقض والدستورسه العليا
للاستشارات القانونيه واعمال المحاماه
هههههههههههههههههههه
انا لسه محامى صغنون
بتدرب ف مكتب وبشتغل فى شركه مبيعات ف قسم المخازن
بعشق موسيقى الراب
بموت ف اصااله
كنت بلعب كراتيه ومعايا الحزام الاسود
اصلى بحب الغوامق
ههههههههههههههههههه
دلوقتى شويه بادى بلدنج ع خفيف
وبعشق العقرب المصرى وكل اعضائه وزواره
ومشكوووووور يا اوسم وسيم ع الدعوه الحلوة دى
دايمن متالق

أنا باشكر كل من لبى الدعوة دي وباخص بالشكر على ورامي وياريت كل الأعضاء يدخلوا ويلبوا دعوة التعارف ، وعايز أقولك يا على إن السن مش شرط أساسي في أي علاقة صداقة ، المهم التوافق في وجهات النظر والمبادئ .. وأنا شايف من ردك إنه على الرغم من صغر سنك إلا إن النضوج المبكر باين عليك بدليل إنك بتقول انك بدأت تدور على حاجة مفيدة .. وأنا عن نفسي برحب بيك كأخ طبعاً أولاً وكصديق ثانياً ويشرفني صداقتك .

شكرا يا اسامه و يارب تكون مبسوط فى اجازتك

نورت الموضوع والموقع يا أسامة ونورت مصر بلدك .

انا بقى اسمى :محمود عبد العظيم محمد الضبع
وفيه اعضاء كتير قوى قوى بحبهم يعرفونى
واللى الناس ماتعرفوش عنى انى طالب فى كلية التجارة جامعة الزقازيق
تصدقوا انى بحب الكومبيوتر والانترنت
هاتقولوى عادى فيه غيرك
هاقولكم انا بحب صيانة الكومبيوتر ولو ببلاش
هاتقولوا ايه الشخص الغريب ده
وكمان اللى الناس ماتعرفوش عنى
انى بعشق الطبخ وبعرف اطبخ اكلات مصرية كتير
وتصدقوا انى بحب المكرونة بالصلصة وجنبها فراخ
هاتقولولى عادى غيرك بيحبها
هاقولكم انا بحب اعملها بايديا
هاتقولولى وبتحب ايه تانى
هاقولكم انا بحب مصر وعشقها فية حتى النخاع
وطبعا انتوا عارفيين انى عندى 19 سنة
وطبعا انتوا عارفيين السنة اللى جاية هايبقى عندى كام سنة...خلوها مفاجاءة
يعنى اعتبرونى اخوكم الصغير
واللى عايز يوجهلى اى اسئلة انا ماعنديش مانع
واللى نفسه فى حاجة اعملهالوا
Iam busy for you

انا أسمى تامر الشريعى

عندى 34 سنة - مطلق

ومقيم بمصر الجديدة القاهرة

أحب القراءة والنت والكمبيوتر

أحب عملى جدا واحب اتقنه


متفاهم جدا و اكره ظلم الناس او الأفتراء عليهم

احب تبادل المعرفة بين الأصدقاء

واهتم الآن بعملى والتصقح على النت


احب الصراحة واكره الكذب

واحب التعارف على أصدقاء جدد

اهلا بيك يا تامر انت و محمود اللى بيحب الاكل و المكرونه ومش تخين ماعرفش ليه و ان شاء الله نكون اصدقاء

شكراً لكل من لبى الدعوة .. وأتمنى أن يلبي باقي الأعضاء .