الأخت العزيزة إيمان .. لو قعدت أسرد أنا مفتقد إيه الناس هاتفتكر إني جشع مش بس طماع ، فبغض النظر عن المفتقدات الشخصية لأنها كتير .. أنا هاسرد بعض المفتقدات العامة ، ولو إني عارف إن مش ده اللي تقصديه ، بس رد خارج الموضوع أحسن من مفيش رد خالص ... ولا ايه ؟؟؟!!!
أولاً : أنا مفتقد وبشدة أعضاء يردوا بضمير عى الموضوعات ، لأني ملاحظ إن الأعضاء مش بيردوا ومعظمهم بيدخلوا الموقع عشان الأفلام وبس ومش لاقي إنتماء حقيقي للموقع غير عند القلة واللي انتي منهم طبعاً ، عشان كده أول مفتقداتي العامة إني مفتقد وجود أعضاء مشاركين بجد مش إقتباس وشكرا ومشكور و thanks
ثانياً : مفتقد الشعور بالحب ، وللتوضيح مش أنا اللي عايز أحب ... أنا قلبي والحمد لله مليان بالحب وقرب يفيض ، لكن الشعور بالحب اللي باتكلم عليه هو حب الناس لبعضها ... وإن يكون قلبهم على بعض ، وإن الناس تنفذ قول الرسول ( عليه الصلاة والسلام ) ... { لا يؤمن أحدكم حتى يحب لأخيه ما يحب لنفسه } لأن أنا شعاري الأول في الحياة هو ... *** ما إستحق أن يولد من عاش لنفسه فقط ****
ثالثاً : أنا مفتقد الشعور بالأمان .. الناس كلها دلوقتي إنتشر على لسانهم كلمة ( إحنا عايشين على كف عفريت ) ورغم تحفظي الشديد على الجملة من الجانب الديني إلا إنها بتعبر عن ما يشعر به الناس .. يعني المهم المقصود منها .
الناس لا تشعر بالامان لأنه لا شيء يدعوا إلى ذلك وأنا منهم ، وعلى رأي المثل ( محدش عارف بكرة هايجيب إيه ) .
دي كانت نبذة عن المفتقدات العامة في حياتي ... أما المفتقدات الخاصة بقى .. فأنا أوعدكم إني هاطلب من العقرب المصري يزود مساحة السيرفر بتاع الموقع شوية عشان يكفي المفتقدات الشخصية اللي هاسردها عليكم في موضوع آخر إن شاء الله ...... وطبعاً عنوان الموضوع هايكون في المشمش .
يا رب بعد ما قولت أنا مفتقد ايه الاقي حاجة منهم عشان الواحد حزين على مفتقداته
والسلام ختام وشكراً يا إيمان وإلى الأمام .
الأربعاء 17 يونيو 2009 - 11:51
