والله و عملوها الرجاله و وكسو مصر و موتوا رجالتها

والله و عملوها الرجاله و وكسو مصر و موتوا رجالتها
طبعا العنوان بتاعى لكن الأرتجاله اللى هتقرأوها دى من تأليف
أديب الموقع العضو المنتمى وسيم الأشقر

*اه والنبي ياختي
*ومين سمعك
*انا امبارح كونت قاعدة باتساير مع أم ابراهيم
*قام الولا حودة داخل يجري عليها
*ويصرخ ويقول الحقي يامى
*الحقي يامى
*إحنا يختي اتفزعنا
*اه والنبي
*امه شخطت فيه
*في ايه ياواااد
*مالك
*قالها أبويا على القهوة مسورق
*قومي الحقية
*الولية خبطت على سدرها وقالت يا لهوي
*يالهوي ياخرابي
*قومي يابت يا دوسة خدي بالك من أخوكي على مانزل أشوف ابوكي جراله ايه
*تلاقيه بلبع حاجة من اللي بيدوهاله اصحابه الموكوسين
*آدي أخرة القهواي وقعدة الشوارع واللي بيجيلنا من ورا منها
*بس ياختي وعليها
*نزلت السلم وهي قاعدة تبرطم يمين وشمال
*لحد ما وصلت القهوة لقت جوزها ممدد على الأرض
*بس ياختي وعاديكي
*راحت راقعة بالصوت الحياني
*يالاااااااااااهوووويييي
*قوم يا سعيييييد
*قوم يابو ابراهيم
*قوم ياخويا مالك
*ماله الجدع جراله ايه
*الناس ياختي كات ملمومة حواليه
*والراجل قاطع النفس مش عارف يفتح بقه
*تقوليش بيوزعوا لحمة
*أنا ياختي روحت شاخطة فيهم
*وانتي عارفاني بقى لما حسي يعلا
*ماقولكيش
*راحوا موسعين على طول
*اللي جاب بصلة واللي جاب إزازة ريحة
*والراجل قاطع النفس مش عايز يقوم لحد ما الإسعاف جت خدته
*وطبعاً إنتي عارفاني ماتوصاش
*خدت بعضي وتني وراهم
*مانتي عارفاني لازم أقعد على الخبر
*بس قبل ماروح وراهم
*قعدت أسأل وأتقصى
*خدت الولا ميخا القهوجي على جمب
*أصل أمه صاحبتي هابقى أحكيلك بعدين
*وسألته
*ايه ياواد اللي حصل
*قام قالي على اللي فيها
*آل ايه ياختي
*الراجل وهو بيتفرج على الماتش
*وقع من طوله
*أنا قولت فعقل بالي ايه ياخواتي الرجالة المفستكة دي
*بقى حتة مطش يعمل فيه كده
*إلا قوليلي ياختي
*هو مين كان بيلاعب مين ؟

ممنوع النسخ أو التداول حقوق الطبع و اانشر محفوظه لوسيم الأشقر

ههههههههههه ... عملتيها ونقلتيها ... ماشي ... شكراً أوي على الإطراء الجميل ده إنتي كلك ذوق ...
بس الحاجة الجميلة في الموضوع ... إن الست دي لما عرفت إن اللي كان بيلعب مصر وأمريكا وإن أمريكا غلبت مصر 3 / صفر .... هي كمان سورقت وطلبولها الإسعاف ....

الفقير إلى الله العضو المنتمي .

اسكتى يا هبة والله انا زعلانة زعل فظيع كسفونا

يا إيمان إزعلي على حاجة تستاهل .

وبعدين ما قولتيش رأيك في الموضوع .

معلش يا ايمان و هونى على نفسك اصلهم مش مقدرين ان وراهم ملايين وبرضه نلتمس لهم العذر لان موقفهم صعب جداا[i]

فعلاً موقفهم صعب ومحرج .. حاجة تكسف Embarassed

وسيم طالما رديت على الموضوع يبقا اكيد عجبنى ربنا يقف جنبهم بقا ونشوف كاس العالم

يا رب يا إيمان يارب ..