الفيس بوك مكتئب ليه >>>ادخل وانت تعرف

الفيس بوك مكتئب ليه >>>ادخل وانت تعرف Facebook_interface

اممممممم .. مش عارف الحقيقة ابدأ منين بالظبط بس هو الواضح يعني ان فيه حالة اكتئاب و نكد حادة منتشرة بين الناس اليومين دول .. افتح الفيس بوك في امان الله الاقي ولا 15 او 20 واحد كاتبين ستاتس كلها نكد و بؤس و يأس و ده يكتب اغنية كئيبة و دي حاطة صورة واحدة مفحومة من العياط .. و بس يا بابا .. اهدي يا ماما .. مش كده يابني ... متعمليش في نفسك كده يا حبيبتي ... و بعد ما ابقى داخل و نفسي مفتوحة و الدنيا لذيذة الاقيها اسودت بعيد عنكم , حاجة تغم ... ولو داخل وانا اصلآ متنكد شوية الاقيهم كملوا عليا بقى و النكد ده اصله عدوة و على رأي اللي قال " من جاور السعيد يسعد " برضو اللي بيفضل مع حد كئيب بيكتئب , حتى ولو على سبيل المشاركة الوجدانية – تكتئب مجاملة يعني – او انك تلاقي الناس مكتئبة و انت فرحان فتخاف من العين – و العين ياخويا فلقت الحجر – و تعمل انت بقى انك مكتئب و يمكن اكتر منهم ... المشكلة انك ممكن ساعات تصدق انك مكتئب وتكتئب بجد هههههه ... زي كدبة جحا عالحرامية تعرفوها ؟ دي بتحكي ان في مرة طلع على جحا 2 عشان يثبتوه فقالهم انتو جايينلي انا الغلبان و سايبين حفلة الملك اللي هتبتدي كمان شوية صغيرة و فيها اكل كتييير و هيوزعوا دهب كمان عالناس و هي خارجة ؟؟ راحوا الحرامية طمعوا و صدقوا و سابوه و مشيوا , فبعد ما مشيوا راح جحا قال لنفسه : ما يمكن يكون فعلآ فيه حفلة و اكل و دهب .. و راح القصر و هناك قابل الحرامية اللي عرفوا انه بيضحك عليهم و سرقوه فعلآ !!!
النكد فعلآ عدوة زي الإبتسامة ماهي عدوة .. و لكن مع الفرق طبعا – و اي فرق - و مفيش حد مش بيتعرض للإكتئاب طبعا بس اكتئاب جماعي كده !!! آه اكتئاب جماعي بيسموه علماء النفس " اكتئاب موسمي " يعني مش شتوي بس فيه ناس بيجيلها في الربيع و الصيف و الخريف لكن الغالبية العظمى في الشتا , وده اكتئاب غير العادي اللي بييجي نتيجة ظروف او مشاكل معينة ده مرتبط بتغيير الجو .
و اعراض اكتئاب الشتا هي : صعوبة فظيعة في الصحيان الصبح و دايما عايز تنام تاني – و بصراحة النوم الصبح في الشتا بيبقى جمييييييل - , حالة فجع زائد للسكريات و النشويات مما ينتج عنه زيادة في الوزن و الصيدليات تشتغل اكتر في بيع ادوية التخسيس – مصائب قوم عندنا فوائد - , فيه حاجات تانية زي انك تحس ان مش قادر تعمل حاجة او تكمل حاجة للآخر و البعد عن الاصحاب و الأهل و فقدان الإحساس بالسعادة ناحية اي حاجة , شايف الدنيا سودة و منيلة و عايز تاكل و تنام بس .
الأعراض دي مش بتيجي لناس و ناس لأ , لأ هي بتيجي لكل الناس لكن مش كلها و مش شرط بنفس الصورة , لكن التغيير عموما مع تغيير حالة الجو دي حاجة طبيعية جدا يعني ده مش مرض لكنه ظاهرة طبيعية ,وان كانت بتختلف من الشخص اللي بيميل للكآبة – ده بيبقى معلم في اكتئاب الشتا- او الشخص المتفائل – و ده بيقدر يتكيف بسرعة و تروح الأعراض دي منه في اسرع وقت - .
و ايه اللي بيحصل بقى مع تغيير الجو عشان يحصلنا كده ؟
بيقلوا العلماء ان ده بيرجع لنقص مادة السيروتونين – و جي المادة المسئولة عن لإحساس بالسعادة و تنظيم الطاقة و اليقظة و الحاجات الحلوة دي – و نتيجة للنقص ده بيحصل الإكتئاب ده , السبب التاني هو قلة كمية الضوء عن الصيف لأن الشمس بتغيب بسرعة و ده بيدي احساس ان اليوم خلص بدري و خلاص مش هينفع يتعمل فيه حاجة .
يبقى الحل ايه عشان الرغي الكتير ده – مش كتير اوي يعني - :
اول حاجة انك تتشملل و تصحى بدري عشان تشوف الشمس اطول وقت ممكن و بكده تحس ان اليوم لسه بخيره , كمان الإضاءة مهمة جدا في الحالة دي , ده حتى فيه طريقة علاج اسمها " العلاج بالضوء" و دي لأهمية انك تتعرض للضوء لمدة طويلة عشان ما تحسش ان الدنيا بتضلم بدري .
الحاجة التانية ان مادة السيروتونين دي بتزيد مع اكل الشيكولاتة و شرب الكاكاو – اظن ده احلى علاج في الدنيا – فزود منهم على قد متقدر .
فيه بقى كمان انك بلاش تعيش جو الكآبة ده بضمير , يعني بلاش اغاني كئيبة و ناس مكتئبة و صفحة الحوادث و مسلسلات التليفزيون و برامج البيت بيتك و العاشرة مساءا و 90 دقيقة و دول لو استغنيت عنهم من غير شيكولاتة ولا صحيان بدري هتبقى زي الفل انشاءالله . حاول تعيش لحظات حلوة , تشوف حاجة بتضحك اعمل اي حاجة غير انك تجري للنكد برجليك .
آخر حاجة احب اقولها بقى ان احنا بصراحة بندلع!!!!!!! عندنا شمس طول السنة و يجيلنا اكتئاب !! امال الناس اللي الشمس بتطلع عندهم شهر في السنة دي يعملوا ايه ؟ ينتحروا ؟؟!!! فكوا كده فكوا شوية ده الإكتئاب ده ياما بوظ علاقات على رأي الشاعر اللي انا معرفش اسمه و لا اسم اللي جابه :
كان بيننا شوق و محبة ضيعتهم بلوية بوزك ..
ياخي يحرق المحبة و يحرق اللي يعوزك .......
سلام بقى

الفيس بوك مكتئب ليه >>>ادخل وانت تعرف 2458725323_2d801f80b5_o

جااامد طحن تسلم كيبوردك

الفيس بوك مكتئب ليه >>>ادخل وانت تعرف 247720

عندك حق والله يا حودا بيه