إخواني الأعضاء الكرام محبي الشعر .. وددت لو أشارككم معي ببعض مؤلفاتي عسى أن تنال على إعجابكم .
وسأكون سعيداً بسماع آرائكم فيها ...
وزي ما شوفتم مني موشحات وشعر عربي وزجل .. المرادي هاسمعكم او بمعنى أصح هاقريكم شعر عامي ..
ينفع أغنية عامية يعني .. وأنا باوعدكم أكتبلكم في جميع أنواع وبحور الشعر حتى الشعر الحلمنتيشي ....
والمفاجأة الجاية كمان مقطوعات نثرية من تأليفي برضه ويا رب تعجبكم يا رب ..
ودلوقتي مع القصيدة العامية بعنوان ( لازم ) من تأليفي .
وحياة سهري وجفني اللي مازارهوش النوم
وحياة اللي ما بينا اللي انت نسيته في يوم
وحياة حب سنيني اللي أنا كان نفسي يدوم
وحياة قلبي اللي انت كسرته وبات مظلوم
لازم ترجع تعشق تاني ** وتهجر كل الدنيا عشاني
تطلب ودي وتترجاني ** إنك ترجع بين أحضاني
لازم أسيبك فترة تعاني ** لأ مش هاضعف هانسى حناني
ولا هاتأثر لو لثواني ** مانت الظالم .. إنت الجاني
*
*
*
وحياة قلبي اللي انت مليته جراح وهموم
بعد ما زرع الحب وجنى أشواك وكلوم
وكل ما تغلط ترجع ترمي عليه اللوم
وتفضل تظلم تقسى وعذرك مش مفهوم
لازم ترجع تحلم بيه ** تبكي بدمع الدنيا عليه
تبكي بحرقه فراق لياليه ** وتبوس تاني تراب رجليه
لازم أسيبك برضه شوية ** هاشفي غليلي هاشفي عنيه
كل ده مش هايأثر فيه ** مانا أحزاني ماكاتش شوية
==========****============
إخواني أرحب بآرائكم وتعليقاتكم .
ملحوظة : جميع مؤلفاتي المنشورة بالموقع مسجلة بالمصنفات الفنية وحقوق الطبع والنشر محفوظة .
ولا يسمح بنقلها بتاتاً أو تداولها عبر الإيميلات أو المواقع الأخرى .
الأحد 21 يونيو 2009 - 4:29
