يا ترا كل واحد فينا ببقا فية ميزة وببقا فية عيب فى شخصيتة سواء هو شايف العيب والميزة او غيرة شايفهم يا ترا اية ميزتك واية عيبك

انا اول واحدة حرد انا ميزتى انا مبزعلش من حد خالص الحمد لله عقلى كبير وعمرى ما زعلت حتى لو حد اتقضنى بتقبل انتقاضة وبحاول اغير من نفسى وبسامح الكل اما عيبى انى عنيدة جدا ومبقتنعش بسهولة

ولا رد يا جماعة الناس مفهاش عيوب خالص ولا اية لغاية دلوقتى 5 دخلوا ومشيوا ما سبوش كلمة هو دة الوعد بتاعنا برضوا

يا إيمان واحدة واحدة .. الصبر .. كله هايجي بالصبر .. ودي حاجة أنا مؤمن بيها .. إن ما دام الواحد بيبذل مجهود وبيتعب .. أكيد ستكلل جهوده بالنجاح .. ومش عارف ليه حاسس إني مش أول مرة أقول الكلام ده في الموقع .. بس بصراحة مش فاكر إمتى ولمين .. المهم .. أنا يا ستي هارد عليكي أهو وإن شاء الله يرد باقي الأعضاء .. وعلى فكرة .. قبل مادخل كان عدد المشاهدات هو 7 ودلوقتي بعد ما دخلت هايبقى 8 .. وبعد ما ارد وانتقل لصفحة مشاهدة مساهمتك اللي هي نفس الصفحة هايبقوا 9.. وانتي لما كتبتي الموضوع أول مرة وانتقلتي لمشاهدة المساهمة اتحسبت مشاهدة .. وعندك ردين في نفس الموضوع .. كل واحدة بمشاهدتين .. مرة لما دخلتي على الموضوع عشان تكتبي الرد .. ومرة لما انتقلتي لمشاهدة مساهمتك .. يعني 4 مشاهدات .. هيه بتتحسب كده .
يعني إنتي لوحدك محسوبلك 5 مشاهدات .. وانا إتنين .. وهمه كلهم 8 مشاهدات .. يعني تلاقي واحد بس هو اللي دخل وماعرفش يقول ايه .. وممكن يكون إنتي ومش واخدة بالك
إصبري وكله هاييجي بالصبر إن شاء الله .
الموضوع مش إن الناس بتدخل وماتردش بس .. الموضوع إن الناس ما بتدخلش أصلاً .. والمواضيع اللي من النوع ده اللي بتحتوي على أسئلة زي دي .. نوع معين بس من الأعضاء اللي عنده الإستعداد للمشاركة فيها .
ولا تصلح للحكم على الأمور .. لكن مواضيعك التانية اللي فيها موضوع بتتكلمي فيه عن شيء معين أو فكرة معينة .. أو طرح لموضوع جديد أو خبر جديد .. ده موضوع كل الناس ممكن تشارك فيه ويصلح الحكم من خلاله على الأمور .
أرجو إنك ماتكونيش لسه زعلانة .. إنتي ورده المنتدى ومن غيرك المنتدى مالوش ريحة ..
مع خالص تقديري وإحترامي .
أخوكي العضو المنتمي .

الله يخليك يا وسيم والله كلك زوق طب منتا مقلتش اية ميزتك وعيوبك ولامش عايز تشارك

ههههههههه ... فعلاً الكلام خدني ونسيت .. بصي ياستي .. أما عن المميزات فأنا مش هاقدر أقولهم .. لأن ما فيش حد بيمدح في نفسه غير المغرورين ... لكن ممكن أقدر أقولك حاجة بتتقالي كتير .. ومع إنها ميزة إلا إنها ساعات بتغيظ حد مني .. وهاقولهالك بس زي ماتقالتلي على لسان واحد صاحبي .. عشان زي ما قولتلك مش باحب أتكلم عن نفسي فاهاقولك هو قاللي إيه :
كونا قاعدين أنا ومجموعة من إصحابي سهرانين مع بعض وإتكلمنا في حاجات كتير أوي والكلام بيجيب بعضه .. لحد ما واحد فيهم وهو شخصية معروفة جداً على فكرة بس مش هاقول إسمه بس هو ممثل .. وممثل حكاية كمان بالذات لما يمثل في الواقع مش قدام الكاميرا .. طلع فيه في وسط الكلام مرة واحدة وتقمص شخصية الحاقدين وقالي :
يا أخي هو إنت إيه .. مكتبة .. الواحد يتكلم في الكورة تتكلم نكلمك في السياسة تتكلم في الدين تتكلم في الأغاني والأفلام تتكلم .. ايييييييييه .. مش سايب حاجة وكل حاجة يكلمك فيها كأن هو ده تخصصه ويتبحر ويتعمق .. هو ايييييييه .. إنت مفيش حاجة مابتفهمش فيها ... مفيش حاجة أبداً .. قاعد مع كولومبوس .. إنت بتاع كمبيوتر ولا وزير الثقافة .. ده حاجة تجن يا أخي ده ماسابش حاجة .. قولتله ياعم مالك .. قالي ياجدع إوعى كده هو في كده .. إنت بتجيب الكلام ده منين ..
طبعاً مش هاقولك .. هو قال الكلام ده وكله فطسان على روحه من الضحك .. ومحددش عارف يمسك نفسه .. بس أول ما بطلوا قولتلهم عاجبكم كده ؟ .. كلهم ضحكوا تاني وقالولي بصراحة عندوا حق ..
وهو قالها بصراحة بحقد شنيع .. بس هزار طبعاً مش حقد بجد .. بالذات حتة بتاع كومبيوتر دي .. حسسني إني واقف على فرش في الشارع ببيع كمبيوتر .. ولا شايل شنطة على كتفي وبالف أنادي .. أصلح كمبيووووتر .. أنزل سوفت وييييييييير ..
بإختصار .. أنا في ناس كتير بتقولي إنت كبير أوي على سنك .. بتحسسنا إنك عشت 200 سنة .. ومش عارف ده عيب ولا ميزة .. بس بصراحة مش حاسس إن ده ممكن يكون عيب .. أنا حتى من صغري من وانا صغير أوي .. عمري ما صاحبت حد من سني ... دايماً كونت بصاحب اللي أكبر مني .. وما كونتش باحس في وسطهم إني صغير .. ولا همه .. وده كان عاملي مشكلة كبيرة مع والدي .. ودايماً كان يعلق على الموضوع ده ويقولي صاحب اللي في سنك .. وكان يستغرب أوي لما كونت أنا في أولى ثانوي .. ويجيلي إصحابي شباب في كليات ورجالة بشنبات .. كان يضرب كف بكف ويستغرب .. ولما كونت في الكلية كان كل إصحابي موظفين ورجالة كبار كلهم متجوزين ومخلفين ومعاهم عيال .. ودي حاجة ملازماني لحد دلوقتي .. كل اصحابي المقربين أكبر مني .

أما عن العيوب .. هاقولها في رد تاني ..

طيب اسمحلى انا اقلك على ميزتك وعيوبك طبعا عن طريق معرفتى بيك فى المنتدى وعن طريق ردودك ميزتك انك انسان مثقف جداجدا وزوق وطيب اما عيبك انك صريح فية ناس بتفتكرلاالصراحة عيب الايام دى انا بالنسبة لية باحب الصراحة جدا يا ترا كلامى صح ولا غلط

مميزاتى :-0
عيوبى :- أى عيب و كل ممكن أن تتخيليه

طول عمر كلامك مظبوط يا إيمان .. فعلاً جايز الصفات دي تكون فيه .. لكن أختلف معاكي جداً في إعتبار إن الصراحة عيب .. لأن الناس اللي بتتكلمي عليهم دول همه اللي عيب .. مش الناس الصريحة ..
والمشكلة مش في الأيام دي ولا حاجة .. الناس دول موجودين في كل وقت وعصر وزمن .. عمر ما زمن خلا من المنافقين ..
وانتي فكرتيني بقول الشاعر والإمام أبو عبد الله الشافعي :

هبة ده كلام غير صحيح .. يمكن كونتي تقصدي العكس بس اتلخبطي ..

صحيح يا جماعة .. نسيت أقولكم على العيب ..
إحم ... قصدي العيوب ... وأعتقد إن أول عيب واضح ...
أنا ما بحبش حد ينتقدني ... زي أي حد في الدنيا لأن مافيش حد في الدنيا بيحب ان حد ينتقده .. وده مالوش علاقة بتقبل الإنتقاد من عدمه .. أنا باتقبله .. لكن ما بحبوش .. تقيل عليا .... والناس كلها كده .
الفرق بيني وبين الناس بقى إن أنا الحتة دي عندي زيادة شوية .. وده الي بيخليني حريص جداً على عدم وضع نفسي في موضع إنتقاد .. وده كان أكبر عامل مخليني متخوف من فكرة الإشراف أو المراقبة .. إني خايف من الإنتقاد .
تاني عيب بقى عكس العيب الأولاني على طول .. الحمد لله رب العالمين ومن نعمه وفضله عليا إني الحمد لله مش مغرور ولا حاجة .. وكمان يمكن أكون أحياناً ببالغ في التواضع .. لكن ده ما يمنعش إني باشرئب وتطنب آذاني وأهيم من السعادة و و و عندما أستمع إلى مدح أو ثناء .
من الآخر بحب أتسيط بالبلدي كده .. وكلما زاد التسييط كلما حاولت إثبات أني أستحقه .. وده ساعات بيوقعني في مشاكل .. زي مثلاً إني ممكن أتفاني في شغل واضيع فيه وقت كبير ومش هاخد فيه فلوس لكن هاسمع كلمتين شكر وثناء .. وأسيب شغلانة تانية محدش هايمدحني بس هاخد فيها فلوس كتيييير .
يعني بفضل إني أسمع كلمة كويسة أحسن من إني آخد فلوس .. وده دايماً جايبني ورا ..

آخر حاجة بقى لو عايزة يا إيمان تتعاملي بمبدأ الميزة اللي بيعتبرها الناس عيب .. زي الصراحة كما ذكرتي واللي بانت عليا بصورة واضحة أهي وأنا بقول عيوبي وبافضح نفسي على الملأ كده واللي صدقت دلوقتي إنها عيب بعد اللي أنا قولته ده .. انا فية ميزة تانية تعتبر عيب .. وهي إني باحب أساعد الناس أوي .. وبأتفانى في خدمتهم .. ولكن دائماً ومش عارف ليه .. ويمكن ده عشان أنا بازودها شوية وفي ناس كتير أوي بتقولي ده .. بيتحول الأمر دائماً من مساعدة إلى إستغلال .. والخدمة اللي بأديها لحد بمحض إرادتي .. بتتحول إلى حق مكتسب ومفروض .
وده الشيء الوحيد اللي بيضايقني في الميزة دي .. وهي إني باشعر بسعادة أكبر وأنا حاسس إن أنا بساعد حد وأنا مش من واجبي إني أساعده .. بناءً على رغبتي الشخصية فقط في مساعدته ، لكن ما وجه السعادة في آداء أمر مفروض ...
يا رب تكونوا فهمتوا قصدي ..
وياللي رايح كتر من الفضايح .
والسلام ختام .

وسيم اولا مشكور جدا على ردك تانى حاجة انا باحب الصراحة جدا لكن في ناس بتزعل من كدة انا صريحة جدا لدرجة ان فى ناس يتزعل منى جامد واولهم جوزى لما بنتقدة فى حاجة بيزعل رغم انا اعرف لما اكون صريحة مع الناس انى خايفة عليهم وباحبهم انا عارفة اننا صح لكن الناس هى اللى بتعتبرها عيب

أشكرك على حسن ظنك بيه

الشكر لله هبة .. ده حقك ودي الحقيقة .
ومشكورة إيمان على ردك عليه وتقديرك .
ألف ألف شكر .

طبعا هبة مقدرش ارد عليها هى قالت كلام معجبنيش لان بجد هى كلها ميزات انا مش شايفة عيب علشان كدة مقدرتش ارد عليكى يا هوبة يا قمر والله حاسة انك اختى ومش عارفة انا باحبك اوى رغم ان فترة تعارفنا كانت من ايام لكن حاسة انى عرفاكى بقالى سنين تسمحيلى اقول انا ميزتك طيبة حنونة حساسة زوقك روعة وبتحبى تخدمى الصغير والكبير اما عيبك انك شايفة الدنيا بنظرة تشاؤمية شوية

صح .. مظبوط .. تمام .. كلام سليم .. 100 100 .. الله ينور ... أنا موافق ... ومتفق .. وغير معترض .. و .. كفاية كده .

يا جماعه أشكركم جداا جداا على زوقكم العالى ده

....ثوانى نست حاجه هو مين اللى رايح يا وسيم

انا بصراحه مميزاتي زي مالناس بتقول عليا اني حنينه جدا وبسامح بسرعه بس عيوبي طبعا كتير بس اهم حاجه اني عصبيه جدا ودي حاجه بتضايقني جدا

أه أنتى برج العقرب يا امانى و كمان 1-11 يعنى عايزه اقولك انا حفظاكى
و ممكن اقولك كل حاجه فيكى عارفه ليه لانى هتكلم عن نفسى

مش فاهم يا هبة ؟؟
هو مين اللي رايح فين ؟؟؟

مش بتقول يا رايح كتر من الفضايح

اه ه ه ... فهمت .. اللي رايح ده يبقى سواق التاكس .. كان رايح لإيمان عشان ليه عندها فلوس .. عشان في مشوار كده هي عارفاه ماحاسبتش عليه .

لا هى قالتلك خد الفلوس و انت مرضتش

يا ستي أنا أدرى هو إنتي كونتي معانا ؟