كل واحد مننا كان نفسة يكون حاجة معينة وهو صغير زى ما بنسال عيالنا نفسك تطلع اية انت بقا وات صغير كان نفسك تطلع اية انا اول واحدة حقول انا كان نفسى اطلع مضيفة طيران بس للاسف لما كبرت وخلصت ثانوية مخطرتش على بالى خالص رغم ان كان ممكن اشتغل وبسهولة معظم قرايبة فى الطيران يعنى كانوا حيسعدونى وخلاتى كمان مضيفات انت او انتى كان نفسك تطلعى اية

أنا شخصياً وأنا صغير كان نفسي أطلع راجل غني معنديش أي فكرة بيشتغل إيه ويستحسن مايكونش بيشتغل خالص .
المهم غني وخلاص ... ولما كبرت شوية بقى نفسي أطلع أي حاجة إلا إني أكون ظابط شرطة أو ظابط جيش .. لكن ظابط إيقاع ممكن .. وحصل بالفعل .. ودرست في معهد الموسيقى العربية دراسات حرة بجانب الكلية ودراستي الأساسية في قسم الإيقاعات الشرقية .. ومش عايز أقولكم بقى .. باطبل جنان وعملت تسجيلات كتير .. وكونت بالعب درامز كمان مع نمر سوبر ستار .. المهم خرجنا برة الموضوع ... أنا بصراحة مافتكرش أبداً إني كونت عايز أشتغل شغلانة محدده طول حياتي .. حتى لحد دلوقتي .. على الرغم من إني إشتغلت حاجات كتير أوي .. لكن لما بجرب حاجة وتعجبني باستمر فيها ... وحالياً أنا باشتغل مهندس كومبيوتر باعمل صيانة هارد وير وسوفت وير وبصمم برامج وبصمم جرافيك وبصمم مواقع وبعمل شبكات ولو في أي حد عاوز أي إستشارة في الكمبيوتر أنا تحت أمره بدون أي مقابل شرط واحد بس إنه يكون عضو في العقرب المصري وإن الإستشارة تكون على صفحات الموقع ، واللي يعوزني يطلبني على صفر صفر تلات أصفار مفيش .. كلمني ماتلاقينيش

أيوه أحم .. انا كان نفسى أطلع دكتوره جراحه علشان كنت بمسك الضفضيع و أشرحهم و اعملهم عمليات ولما كبرت شويه و دخلت الكليه كنت بحب جداا قسم عماره و كنت شاطره فى الرسم و الخيال و الضل و الحاجات دى يمكن هى اللى خلتنى اصور كويس و كان فيه دكتور بيشجعنى فى الجامعه و لما دخلت عماره لسوء حظى مكملتش
عامة كل هوايه عندى كان بيبقى نفسى انى اكون حاجه كويسه بس اللى كان نفسى فيه قوى ألعب تيروا و أدخل مسابقات صيد لكن قالوا لى لازم العب حديد علشان اقوى عضمة التركوه و الكتف علشان كتفى ما يتخلعش من البنقيه
بس الحمد لله على كل حال بس الحاجه اللى انا شاطره فيها هى الدبيح بعون الله أتخن خروف أجيبه الأرض و ماسيبوش إلا قطع صغيره

فكرتينى يا هبة بموضوع الضفادع دى كان عندنا واحدة جارتنا وسمعتها مرة ان اللى تلحس بطن ضفدع تعرف تزغرد قا انا اصطدت واحدة وقعدت اغسل فية لما قلت بس ولحست بطنها ولا عمل حاجة خالص بس كويس انك تعرفى تدبحى ربنا يديكى الصحة يا رب ويخليكى

انا بقي مفتكرش اني كان نفسي اطلع حاجه كل حاجه كانت بالظروف يعني مكنتش بخطط لحاجه معينه والحمد لله علي كل حال

أيوه يا ايمان المثل ده شائع
و بالنسبه ليكى يا امانى انت لسه بتقولى يا هادى ولازم تبتدى من دلوقتى و انا عارفه و واثقه أنكتقدرى توصلى للى انتى عايزاه مهما كانت صعبته

هههههههههههههههههه ... إنتي مشكلة يا إيمان .. عسل والله .. لحستي بطن الضفضعة فعلاً .. ؟؟
وجوزك كان رأيه إيه في الموضوع ده .. ؟؟ .... إنتي بتصدقي الحاجات دي .. ده كلام كانوا بيضحكوا بيه زمان على اللي ما تعرفش تزغرط .. او تزغرد .. حاجة كده وهم زي أمنا الغولة وأبو رجل مسلوخة ..
بس حصل خير عدت وأكتر من كده وبيزيح ربنا .

صحيح يا هبة .. هو قسم عمارة ده في كلية الزراعة .. مش كده ؟؟

لا السباكه العامه

الظاهر يا هبة من كتر ما بتحاولي تكتري الردود .. ردودك بقت ريحتها وحشة .
سباكة إيه بس ...
أنا طول عمري أسمع إن السباكة العامة دي أساساً قسم من أقسام كلية الصرف الصحي .
وهي كلها 3 أقسام ...
سباكة عامة و مصارف عامة و مراحيض .
خليتيها كلية لوحدها .. ودخلتي فيها العمارة كمان ...
مستوى ردودك بقى .....
كويس .

اة والله يا وسيم لحست بطنها وكنت لسة صغيرة كنت تقريبا فى اولى اعدادى مش لما اتجوزت كنت روحت على بيت ابوية علطولههههههههههههههههههههه

طيب انا مش بتكلم بجد و انت خلط الهزار بالجد أوكى

هو فين الجد ده يا هبة .. مانا كمان بهزر والله .. وبعدين الموضوع من أوله هزار .. راجعي ردي وانتي تعرفي ..
هو في حاجة اسمها كلية صرف صحي ولا قسم مراحيض .... ؟
ماهو واضح ان انا كمان بهزر .. انتي بس اللي فهمتي غلط أو ما خدتيش بالك .
عموماً حصل خير وحقك عليا وانا مش قصدي أزعلك ..
وانتي ست الكل وبكررها .. انتي حورية الموقع .
وسماح المرادي ماكانش قصدي .. مع إن سماح مالهاش دعوة بالموضوع .

انتي مشكلة يا إيمان ودمك زي السكر .. بس أنا لو منك أتخلص من الذكرى دي نهائياً ...

الله يكرمك يا رب طب قولى اتخلص منها ازاى اقطع لسانى اللى لحس الضفدعة ولا اعمل اية

بعد الشر عليكي .. لأ طبعاً .. ده انتي لسانك بينقط سكر ..
أنا قصدي تنسيها ..
وإوعي تجيبي سيرة لجوزك .

انا طول عمرى كان نفسى اطلع ضابط شرطه
او محاميه
بس لا كان ينفع ضابط شرطه للبنات ودا اللى عرفته لما كبرت شويه
ومحاميه دى كان مجموعى كبير ف ثانويه عامهفا بابا
مرديش اضيع المجموع على حقوق
ايييييييييييييييييه
دنيا

معلش يا مينو ربنا يعوض عليكي .